A adxudicación da instalación da iluminación de Nadal realizouse por dous lotes: un de 50.000 euros e outro de 54.000. O alumeado destas festas acenderase o 11 de decembro. O horario diario de funcionamento será dende as 18:00 horas ata as 2:00 horas da madrugada agás os días 24, 25 e 31 de decembro e 5 de xaneiro, nos que a iluminación permanecerá acesa ata o amencer. Este ano incorpóranse cinco novas rúas ao alumeado: Xeneral Pardiñas, Alfredo Brañas, Montero Ríos, Casa da Troia e Porta da Pena. Así, a montaxe deste ano iluminará 30 rúas e prazas do Casco Histórico e outras 19 do Ensanche. Para potenciar o aforro enerxético, optarase preferentemente por luces tipo led e as cores dominantes serán o branco e o azul. Medio Ambiente Outro acordo da Xunta de Goberno foi o relativo a un novo prego e a unha nova licitación para a execución do edificio de servizos previsto no parque Eugenio Granell, no Paxonal. Fíxase un tipo de licitación de 214.435 euros máis IVE. O Consorcio de Santiago financiará esta obra, que consistirá nun edificio cun único volume simple de xeometría ortogonal con cuberta plana axardinada, pechada nunha parte con paneis de madeira e noutra con vidro. A edificación construirase fundamentalmente en madeira e por motivos de seguridade levará cerramento metálico nocturno. Fuente: Ayuntamiento de Santiago de Compostela
|